24 يناير 2009
بسم الله الرحمن الرحيم
الوان
ده مجرد الوان بس فيها حاجات كتير اوى بالنسبالى.....فيها حاجات انا بفتقدها فيها الامل و الخير و التميز و النور و الغضب و الحماس و حاجات تانيه كتير
التميز و العمق.....اسود تقريبا بيقولوا عليه سيد الالوان و هو فعلا كده عندى انا مش عارف ليه الناس بتشوف الاسود هو اللون المناسب للحزن مع انه لون دمه خفيف وفيه من العمق ما يكفى انه يحول اى اكتئاب الى تفكير و يعلم اى حد الصبر جرب مره تبص للون الاسود بس يكون نقى حاول توصل لدرجه متميزه فيه من النقاء هتكتشف ان ده اكتر لون انسجاما مع نفسه ده اللون اللى عنده القدره على تقبل كل حاجه من الناس و بيفضل يستحمل لغايه ما يبقع ساعتها اعرف انك ظلمت اللون ده
الحماس و الغضب.....اهلى
على ولد صغير عمره على اد حروف اسمه بس علاء ده اخوه الكبير و سبعه هى سنين عمره فى يوم من الصبح اتفقوا و فى اللعب اتشغلوا و من شده الحماس تعبوا هو ده الحماس و بالذات عند الصغيرين بس فى لحظه اتحول لغضب لما اختلفوا هو ده الحماس الشديد و الغضب السريع هى ده الطاقه اللى تبنى...و تهد لو زادت عن الحد من الاخر كده ده لون منعرفش نغيش من غيره...من غيره الدنيا كلها تبقى برود و لا مبالاه هو لون بنعشق نشوفه فى شفق و غسق و من عيره كله هيبقى عدم.......احمر
ابيض
امل وليد و طريق ظهر من قلب ظلام شديد...لو عايز بجد تعرف قيمه النور الابيض لازم تكون فى صحرا مفيهاش اى ضؤ فى ليله غير مقمره و بص و شوف النجوم...او تخيل نفسك فى مكان ضلمه و فجأه ظهر ضؤ ابيض بعيد جدا جدا و على هداه انت مشيت و بفرحتك بيه بكيت...الابيض هو استداره بدر فى سماء خالق الخلق هو ضحكه طفل معاش فى الدنيا غير شهر و بس...هو كل حاجه نقيه و بس
العطاء و الخير.....اخضر
يــــــــــــــــــــــــــــــــــــــــــــــــــــــــــــــــــــــــــــــــــــــا الله
و لو كنت قدرت اقول اكتر من كده كنت قولت فعلا دة اللون المظلوم لون الخير و الزرع و القدره على العطاء هو دة اللون اللى انا نفسى اكونه هو بيمثلى نبات ثابت و الدنيا بتمشى حواليه هو القدره انى ابنى و ازرع و اعمر ابتدى حاجه من لاشىء عشان اوصل لاعظم شىء هو لون التأمل فعلا لو فضلت اتأمل فيه مش هاوصل لاخره بحس بعظمه ربنا فى اللون ده و بعرف احنا اد ايه جاحدين لو تخيلت ان ربنا ادانا نعمه ان احنا نبنى و سبحان الله مفيش نبات زرعناه طلع وحش او بخيل و قرر انه يحرمنا من الاستفاده بيه و دايما بيطلع احسن منا و لما حد بيرميه بالموجعات بيرد باطيب الثمرسبحان الله هو ده اللون الاخضر بالنسبالى هو ده العطاء
تمت

3 What do you think?:

Crazy Rose يقول...

الله يا عبدالله جميل جدا وصفك للألوان
أول مرة اشوف حد بيوصف كل لون بالدقة والاحساس العالى ده
انت خليت كل لون كأنه صورة فنية متكاملة او شخص مستقل قائم بذاته
وده فى حد ذاته ابداع
برااافووووو برافوووو
ومبروك على القالب الجديد شكله حلو جدا
ومستنيين الجديد يا فندم واهلا بك فى الكفاح على رأى مصطفى :-)

,واحد نفسه يتغير يقول...

اولا اسف علي التاخير
ثانيا يسعدني اني اقولك انك ابدعت
حقا ابدعت
شخصيا انا من محبي الاوان والكلام عن الالوان بس بصراحه معرفتش اوصل للقدره ديه علي الوصف
وانا بقرأ في اللون الابيض عنيا دمعت
تعبيرات وتشبيهات غايه في الروعه بعيده عن اي تكلف او مبالغه
وصف حي وحقيقي لمشاعر وتجارب جوانا بسبب الالوان
....
مش عارف عشان ان بحبهم اكتر من غيرهم ولا عشان انت ابدعت فيهم بس اكتر اتيتن اثروا فيا الابيض والاسود
الابيض بالذات
"امل وليد و طريق ظهر من قلب ظلام شديد
على هداه انت مشيت و بفرحتك بيه بكيت
استداره بدر فى سماء خالق الخلق هو ضحكه طفل معاش فى الدنيا غير شهر و بس..."
تفوقت علي نفسك في الجملتين دول
اجمالا الموضوع رائع وان كنت حسيت بالكروته
كان ممكن تكتب حاجات تانيه وتوصف اكتر من كده
بس بالنسبه لاول مره
حلو جدا
وبس

إلى متى ؟! يقول...

يمكن أكون أول واحدة قرأت هذا العمل
الدقيق وبالفعل كتبت تعليق تفصيلى بس مرضاش يتبعت!!!!!!

فقلت خلاص بقة ربنا مش رايد
ولما اتبعتلى اللينك قلت أجرب تانى يمكن

بس لقيت كتير مما كنت أنوى الإشارة اليه قد اشير اليه بالفعل!!!

أضيف فقط قليلا على ما قد قيل:

"مجرد ألوان"
بالفعل لقد تجردت من كل شىء لتزداد سعتها أضعافاً كى تحوى معانٍ وأحاسيس وصفت بقلمٍ متفكرٍ ذو حبرٍ مميز صامتٍ كلما ازداد صمته ازداد تفكره فازداد عمق المعنى والاحساس ليترك علامة بارزة فى العقول والقلوب

أما الأسود...فأبرز العلامات التر تركت قد حفرت بتلك الكلمات:
"وفيه من العمق ما يكفى انه يحول اى اكتئاب الى تفكير و يعلم اى حد الصبر"

التفكير والصبر..قد يكون أولهما يستوجب الثانى ولكن الاعجاز يكمن فى القدرة على التطبيق!!


أما الأحمر... فإنها علامة أخرى برزت باللون ذاته وحفارها:

"من غيره الدنيا كلها تبقى برود و لا مبالاه هو لون بنعشق نشوفه فى شفق و غسق و من عيره كله هيبقى عدم"

وكلما أتى البرود جلسة غير طويلة أمام الشفق والغسق تكفى لاستدعاء رياح دافئة تحيل البرود عملا بلا ركود


أما الأبيض...فما كنت أنوى قوله قد قيل فيما سبق وليس لدى المزيد....


أما الأخضر... فاعلم أن العلامات البارزة كثيرة ولا أملك الشجاعة كى أؤكد على احداهما وأغض الطرف عن الأخرى فقد أصبت عين الصواب حينما قلت" مش هوصل لآخره"

واعلم أنك لم تصل أيضا لآخر ابداعاتك بل لم تقطر إلا بالقليل من بحرٍ أعلم من الله أنه غزير
فان كنت تخشى علينا التجمد أمام كلماتك
فاعلمك انما نحتاج لبعض من التجمد كى يستثير الحماسة بداخلنا للسعى وراء طاقة جديدة ولكنك لا تمهلنا حتى كى نأتلى الجهد فى هذا السعى
فتقدم لنا ما يستجلب تلك الطاقة بعد التجمد لنعلم قيمتها وقدرها- فبضدها تتميز الأشياء-

وأخيرا أأسف عن الاطالة ولكنه هو حالى حينما لا أقوى على التعبير...
فانى أقول الكثير ...مع علمى أنه مخل لكنى لا أجد عنه بديل....

وننتظر المزيد باذن الله تعالى

For a Special Someone

For a Special Someone

HoPe

المتابعون