10 فبراير 2010

PostHeaderIcon عسليه

11:57 م | مرسلة بواسطة انسان غامض | تعديل الرسالة


بسم الله الرحمن الرحيم
عسليه
زي كل الاطفال كنت بعشق اللحظه اللي اسمع فيها جرس اخر حصه و اد ايه كانت بتبقي اجمل لحظه في اليوم كله ببساطه عشان كنت هروح بس مش دي القضيه المهم اني كنت هركب الاتوبيس عشان اكل عسليه-رغم انى مبحبهاش- والاهم اني كنت هشوفها
كانت ببساطه اجمل بنت شافتها عينيا و كنت معتقد ان مفيش حد ينفع يكون اجمل منها
الموضوع ابتدا امبارح فى الاتوبيس و انا مروح
فجاءه لقيتها قدامى بنوته اصغر مني و شعرها احمر و عينيها عسلي ولابسه فستان اكبر منها و كمامه اطول من ايديها الصغيرين فضيلت باصصلها ومش قادر ابعد عينيا عنها و تمنيت ساعتها ان الدنيا تقف و نفضل انا وهي وبس و ان اي حاجه غير كده تختفي و مفقوتش من اللحظه ده الا على صوت الراجل بتاع العسليه و "ايوه العسليه بنص جنيه حلى بقك بنص جنيه ساده و بسمسم و بنص جنيه"
فلقيت نفسى بطلع اخر خمسين قرش معايا و بشترى عسليه –رغم انى مبحبهاش- و بفتح كيس العسليه و بعزم علي البنوته ده بواحده عشان اكتشف ساعتها قد ايه صوابعي ده تنفع مفكات او صوابع كفته مقارنه بصوابعها الرقيقه اللي اخذت مني العسليه و بدات تاكلها بايديها الاتنين
كنت ساعتها فى غايه السعاده وده كانت من اسعد لحظات حياتى بس يا خساره في راجل جه مسكها من ايديها و نزلوا من الاتوبيس و سابوني تايه في عنيها العسلي و اخيرا جت المحطه بتاعتي و نزلت و روحت بس فضلت افكر فيها حتي لما نمت باليل لقيتها مستنياني في الحلم و هي بتاكل العسليه و صحيت وانا واثق انى هشوفها تانى انهارده و يمكن اكون مسمعتش اى حاجه انهارده فى المدرسه غير جرس اخر حصه اللى انا كنت مستنيه من قبل ما اروح المدرسه اساسا و فعلا ركبت الاتوبيس و بجد مشفتش حد فى الاتوبيس لغايه ما لقيتها تانى قدامى
بنوته اصغر مني و شعرها احمر و عينيها عسلي ولابسه فستان اكبر منها و كمامه اطول من ايديها الصغيرين و برضه مفقوتش من اللحظه ده الا على صوت الراجل بتاع العسليه و "ايوه العسليه بنص جنيه حلى بقك بنص جنيه ساده و بسمسم و بنص جنيه" و برضه مقدرتش اعمل حاجه غير انى اطلع اخر خمسين قرش معايا و اشترى بيها العسليه-رغم انى مبحبهاش- عشان اعزم على البنوته و ناكل عسليه مع بعض بس يا خساره جه راجل و مسكها من ايديها و نزلوا من الاتوبيس و سابونى لوحدى فى وسط الناس ده كلها
و للاسف من ساعتها مشوفتهاش فى الاتوبيس و فضلت كل يوم استناها و اروح اعيط لغايه تانى يوم على امل انى اشوفها بس يا خساره مشوفتهاش ولا هى ولا بتاع العسليه
و فضلت على حالى لغايه ما كبرت و اتخرجت و اشتغلت لغايه مجه يوم عربيتى عطلت و ركبت فيه الاتوبيس و فجاءه لقيتها قدامى بنت اصغر مني و شعرها احمر و عينيها عسلي ولابسه فستان بس كمامه علي قدها" و لقيت نفسى بطلع اخر خمسين جنيه معايا و بشترى منها كل العسليه اللى معاها – رغم انى مبحبهاش-
تمــــــــــــــــــــــــــــــــــــــــــــــــــــت
1 What do you think?
الاشتراك في: الرسائل (Atom)

For a Special Someone

For a Special Someone

HoPe

المتابعون

Blogger Template created with Artisteer.